Sunday, August 25, 2013

သိမြင်ခြင်း

အပြုံးပန်းခက်၊ ရုံးစခန်းထက်
အမုန်းလွှမ်းတဲ့၊ ခန္ဓာကိုယ်အား
ဘုရားသခင်ထံ၊ ဆေးကြောရန်
တစ်ပတ်တစ်ခါ၊ တနင်္ဂနွေတိုင်း
ဘုရားကျောင်းသို့တက်ခဲ့ပါသည်တဲ့။
ကိုယ်တော်ထံမှောက်၊ ၀ပ်တွားခယ
အပြစ်များကို ပြောကြရာဝယ်
အမှန်ကိုဖုံး၊ မုသားသုံး၍
လူသားစရိုက်၊ မသိမိုက်ကို
ကိုယ်တော်မြတ်က သိမြင်သည်။

အပြုံးပန်းများ၊ လှပဝေဆာ
နှုတ်ချိုသကာ၊ ပျားရည်များထက်
ရွှန်းရွှန်းဝေလည်း၊ သင်ရဲ့နှလုံး
အတ္တသုံး၍၊ အမုန်းကိုပွား
မကောင်းမှုကြံ၊ ကောင်းရာကိုမေ့
ဆန့်ကျင်ဘက်နှင့် ကျင့်ကြံအားထုတ်
လူ့သရုပ်ကို၊ လူချင်းမသိ
ကိုယ်တော်မြတ်က သိမြင်သည်။

သူတော်ကောင်းတဲ့၊ ဘုရားဂုဏ်
ဝိညာဉ်ခြုံလွှမ်း၊ လူ့ဘုန်းကြီးများ
မေတ္တာလမ်းများ၊ ဖောက်လုပ်ဆောက်တည်
အကြင်နာတရား၊ လှည့်ဖြားမာယာ
စော်ကားသတ္တိ၊ ဘယ်ဆီဘယ်သို့
နောင်မည့်လမ်း၊ မသိငြားလည်း
ကိုယ်တော်မြတ်က သိမြင်သည်။

            ပိုးပိုး(ပုပ္ပါး)