Wednesday, May 5, 2010

"မြတ်သောစေတနာရှင်များသို့"


"မြတ်သောစေတနာရှင်များသို့"

ကျွန်ုပ်တို့သည် လွန်ခဲ့သည့် မေလလယ်လောက်တွင် ဇာတိရပ်မြေဖြစ်သော ဟင်္သာတမြို့နှင့်ဆယ့်နှစ်မိုင်ဝေးရာ ဘိတ်ရိုးရွာလေးသို့ ပြန်ရောက်ခဲ့ပါသည်။ ထိုနေရာ၌ ရှိနေစဉ် တစ်နေ့သောအခါ၌ ကက်သလစ်ဂေါပကအဖွဲ့ဝင် လူကြီးတစ်ဦးမှ နာဂစ်မုန်တိုင်း ဒုက္ခသည်များအတွက်ဟူ၍ အလှူများ ကောက်ခံသည်နှင့် ကြုံခဲ့ရပါသည်။ ကျွန်ုပ်သည် ၎င်းင်းလူကြီးအား အလှူများကို ဘာသာဝင်အိမ်များသာ ကောက်ခံသလားဟုမေးရာ ဂေါပကလူကြီးမှ ဒုက္ခသည်များမှာ များပြားလွန်း၍ မည်သူမဆို အလှူများထည့်ဝင်နိုင်ကြောင်းနှင့် အခြားဘာသာဝင်များပါ လှူဒါန်းကြကြောင်း ပြောပြပါသည်။ ထို့အပြင် ကက်သလစ်သာသနာမှ ဖွင့်လှစ်ထားသည့် ဒုက္ခသည် စခန်းများတွင် လူမျိုးဘာသာမခွဲခြားဘဲ ခရစ်ယာန်များအပြင် ဗုဒ္ဓဘာသာဝင် များစွာလည်း ပါဝင်နေကြောင်းကို ပြောပြပါသည်။ ပုသိမ်ကက်သလစ်သာသနာမှ ဆရာတော်နှင့် ရဟန်းရှင်လူများမှာလည်း အခြားသော စေတနာရှင်များနည်းတူ မိမိတို့တက်စွမ်းသမျှဘက်မှ စွမ်းစွမ်းတမံ ဤဒုက္ခပြဿနာများကို ဖြေရှင်း နေကြရသည်ကို သိရှိတွေ့မြင် နိုင်ပါသည်။

ကက်သလစ်သာသနာမှ တာဝန် ယူဖွင့်လှစ်ထားသော ဒုက္ခသည်စခန်း လေးခုရှိပါသည်။ မြောင်းမြမြို့ (စမ်းချောင်း )၊ ကနစိုးကုန်း၊ ပင်လယ်သာသနာ နှင့် စိန်မေရီ (မြွေဟောက်) တို့တွင် စခန်း များဖွင့်လှစ်ထားပြီး ဒုက္ခသည်များမှာ ရာပေါင်းများစွာချီ၍ ရှိနေကြပါသည်။ ဤဒုက္ခသည်များ၏ ဘ၀ကိုကြည့်လျှင် ယခင်က ကိုယ့်အိုး၊ ကိုယ့်အိမ်၊ ကိုယ်ပိုင်ခြံနှင့် မိသားစုများ သိုက်သိုက်ဝန်းဝန်း နေခဲ့ကြသည်။ ကိုယ့်ကျွဲနွား၊ ကိုယ့်ထွန်၊ ကိုယ့်လယ်ယာတို့ဖြင့် အသက်မွေးဝမ်းကြောင်း ပြုခဲ့ကြသူများနှင့် ဆားနှင့် ရေလုပ်ငန်းများကို လုပ်ကိုင်ကြသူများလည်း ပါဝင်ကြပါသည်။ ယခင်က ရိုးသား ကြိုးစားလုပ်ကိုင်ရင်း မြန်မာနိုင်ငံ၏ အထက်၊ အလယ်၊ အောက်ပိုင်း ဒေသများအတွက် မရှိမဖြစ် အခြေခံစားသုံးစရာ ဆန်စပါး၊ ငါးပိ၊ ငါးခြောက်များကို ထုတ်လုပ်စိုက်ပျိုးကာ မိမိတို့၏ ကိုယ်ပိုင်ဘ၀လေးများဖြင့် ကျေနပ် ရောင့်ရဲ နေကြသူများဖြစ်ပါသည်။ သို့သော် ရုတ်တရက် သဘာဝဘေးဆိုး တစ်ခုကြောင့် သူတို့အားလုံး၏ ဘ၀မှာ နေ့ချင်းညချင်း ပြောင်းလဲသွားခဲ့ရပါသည်။ အိုးမဲ့၊ အိမ်မဲ့ အခြေအနေသို့ရောက်ခဲ့ရသည်။ မိမိတို့၏ ထွန်ထယ်များမှာ ဘယ်ဆီရောက်မှန်း မသိရသလို တစ်သက်လုံး မိမိတို့နှင့်သစ္စာရှိစွာ အကျိုးပြုရုန်းကန်ပေးခဲ့ကြသော ကျွဲ၊ နွား များမှာလည်း ရေအောက်၌ အသက်မရှိတော့ချေ။ အဆိုးဆုံးမှာ တစ်အိုးတစ်အိမ်တည်း၊ တစ်ရွာတည်းနေ သွေးသားရင်းချာ မောင်နှမ၊ မိဘ၊ မိတ်ဆွေများနှင့်ရှင်ကွဲ သာမက သေကွဲပါခွဲခွာခဲ့ကြရသည့် ဒုက္ခသည်များမှာ တပုံကြီးပင်ဖြစ်သည်။

ဤသို့သော အခြေအနေဆိုးများတွင် စိတ်ဓာတ်ရေးရာပိုင်းတွင် အလွန်ပင် အားငယ်ညှိုးနွမ်းစွာဖြင့် ဖေးမကူညီပေးမည့် ကမ်းလက်အစုံပေါင်း များစွာကို စောင့်မျှော်ရင်း မျက်ဝန်းမှစွန်းစိုနေသည့် မျက်ရည်များကြားမှ ကျန်သေးသမျှခွန်အားများဖြင့် ရှင်သန်နေကြရသည့် ဒုက္ခသည်များ၏ ရင်တွင်းသို့ ကျွန်ုပ်တို့ထိုးဖောက်ဝင်ကြည့်လျှင် ကျွန်ုပ်တို့ကိုယ်တိုင်လည်း စာနာစိတ်များနှင့် ခံစားမိလာပေလိမ့်မည်။


မေလ (၂၉)ရက်တွင် ကျွန်ုပ်သည် တောင်ကြီးမြို့သို့ ရောက်ရှိခဲ့ပြီး မန္တလေး သာသနာ၊ ချောင်းရိုးရွာဘာသာသူတစ်ဦး ထံမှ စာလေးတစ်စောင်ကို ဖတ်လိုက်ရပါသည်။ ၎င်းင်းစာတွင် "နာဂစ် ဒုက္ခသည်များ အတွက် ကိုယ်ချင်းစာမိပါတယ်။ နောက်ပြီး ဘုန်းတော်ကြီးကဦးဆောင်ပြီး အလှူငွေ ကောက်လို့ တတ်နိုင်သ၍ အလှူထည့်လိုက်ပါတယ်" ဟူ၍ပါရှိပါသည်။ ထို့အပြင် စိန်မိုင်ကယ်ရဟန်းဖြစ်ကျောင်းမှ ကိုရင်များ၏ ပြောပြချက်အရ မိမိတို့သာသနာများတွင်လည်း ဒုက္ခသည်များအား သနား စာနာမိကြသဖြင့် အလှူများကို ရက်ရက် ရောရော ထည့်ဝင်ကြကြောင်းကို ကြားရ၍ ပီတိဖြစ်ရပြန်ပါသည်။ ဤသို့လှူဒါန်းခြင်းဖြင့် ဒုက္ခသည်စခန်းများ၏ တာဝန်ခံ ရဟန်းများနှင့် ပုဂ္ဂိုလ်များအတွက် ၀မ်းသာမှု ရရှိစေသကဲ့သို့ ဒုက္ခခံတွင်း ကျရောက်နေကြသည့် သူများအတွက်လည်း အတိုင်း အတာတစ်ခုအထိ များစွာ အကျိုးရှိစေပါသည်။

ဘာသာတရားများ၏ သွန်သင်မှုများအရ ကျွန်ုပ်တို့သည် အပြစ်ဒုစရိုက်ပြု ကျင့်မှုများကို ရှောင်ကြဉ်ရသကဲ့သို့ တစ်ဖက်တွင်လည်း သုစရိုက်ကို ပြုကျင့်နိုင်ရန် ကောင်းမှုပါရမီများကို ဆည်းပူးကျင့်ကြံရပေမည်။ အလှူဒါနပြုခြင်းသည်လည်း ကောင်းမှု ပါရမီဆည်းပူးရာ အကြောင်း အရင်းတစ်ရပ်ဖြစ်ပေသည်။ အလှူဒါနပြုခြင်းသည် ဘာသာပများအကြားတွင် တိုက်ရိုက်သာသနာပြုခြင်း မဟုတ်သော်ငြားလည်း ၎င်းင်းအဓိပ္ပါယ်ကို သက်ရောက်စေပါသည်။ နာဂစ်မုန်တိုင်းအတွင်း၌ ကက်သလစ်သာသနာမှ ဖွင့်လှစ်ထားသော ဒုက္ခသည်စခန်းများတွင် လူမျိုးဘာသာမရွေး ပုဂ္ဂိုလ်များစွာ ပါဝင်ကြပါသည်။ ထိုသူတို့အား သာသနာမှဘက်မလိုက်ဘဲ တန်းတူဆက်ဆံကာ ကြိုးစားဖေးမကူညီပေးသည်။ အနယ်နယ်အရပ်ရပ်မှ ဘာသာဝင်များမှလည်း တက်အားသ၍ ရက်ရောစွာ လှူဒါန်းကြသည်။ ဤလှူဒါန်းမှုများအား မည်သည့် သတင်းဌာနနှင့် မီဒီယာများမှ ဖော်ပြခြင်း မရှိသော်ငြားလည်း အခြားသော စေတနာရှင်အသင်းအဖွဲ့များ နည်းတူ တစ်ဖက်တစ်လမ်းမှလည်း အနယ်နယ် အရပ်ရပ်ရှိဘာသာသူများမှ ဆုတောင်းခြင်း၊ အလှူဒါနပြုခြင်းတို့ဖြင့် ကူညီခဲ့ကြကြောင်း ဘုရားရှင်အသိဖြစ်ပြီး ဒုက္ခသည်များ ကိုယ်တိုင်ခံစားကြရပါသည်။ "သင်သည် အလှူဒါနပေးသောအခါ မထင်ရှားစေခြင်းငှါ လက်ယာလက်ပြုသည့်အမှုကို လက်ဝဲ လက်မသိစေနှင့်။ မထင်ရှားသော အရာကို မြင်တော်မူသော သင်၏ အဘသည် အကျိုးကို ထင်ရှားစွာ ပေးတော်မူလတ္တံ့"ဟု (မဿဲ - ၆း၃-၄) တွင် ဖော်ပြသည့်အတိုင်း မထင်မရှားပြုသော မိမိ၏ အလှူဒါနအကျိုးမှာ အားလုံးစုံကို မြင်တော်မူသော ဘုရားရှင်၏ မျက်မှောက်တွင်မူ ကောင်းကင်ဘဏ္ဍာများပင် ဖြစ်ပါတော့သည်။

အလှူဒါနပြုခြင်းကို သွယ်ဝိုက်၍ သာသနာပြုခြင်း ဆိုရခြင်းမှာ ယခုကဲ့သို့ ဘာသာလူမျိုးမခွဲခြားကာ ကောင်းမှုပြုခြင်းဖြင့် အခြားဘာသာဝင်များအဖို့ မိမိတို့၏ ဘာသာတရားနှင့် ဘာသာဝင်များအား လေးစားလက်ခံမှု ပိုမိုရှိလာပါသည်။ ဘာသာတရား အချင်းချင်းလည်း နားလည်မှု ပိုမိုရှိစေလာပါသည်။ ယနေ့ခေတ် အခြေအနေတွင်လည်း ဘာသာတရားအချင်းချင်း နားလည်မှု ပိုမိုရှိလာစေရန်လည်း လိုအပ်နေချိန် ဖြစ်ပါသည်။ ထို့ကြောင့် အလှူဒါနပြုခြင်း အကျိုးကား မနည်းလှကြောင်း သိရှိရပေသည်။


ကျွန်ုပ်တို့သည် အလှူဒါနပြုခြင်းကြောင့် အချို့သော အောက်ပါ အကျိုးကျေးဇူးများကို ရရှိဖြစ်ပေါ်စေသည်။
၁။ မိမိ၏အလှူဒါနကြောင့် ဘုရား ရှင်ရှေ့တော်၌ မျက်နှာရစေပါသည်။
၂။ မိမိအလှူဒါနကြောင့်လက်ခံရရှိ သူအဖို့ အခက်အခဲပြဿနာများ လျော့နည်းစေသည်။
၃။ မိမိအလှူဒါနကြောင့်တစ်နေ့ မိမိ အတွက် အလှူလက်ခံရရှိသူဖက်မှအကူ အညီပြန်ပေးလာနိုင်စေသည်။
၎။ မိမိအလှူဒါနေကြာင့် ပတ်ဝန်း ကျင် လူများအဖို့ ပီတိဖြာဘာဝနာပွားများ ရစေပါသည်။
၅။ မိမိ၏အလှူဒါနကြောင့် အခြား သောသူများတွင်လည်း ရက်ရောသောစိတ် ဆန္ဒရှိလာစေရန်စံနမူနာတစ်ခုဖြစ်စေပါ သည်။
၆။ မိမိ၏အလှူဒါနကြောင့် မိမိလုပ် ငန်းများအဆပေါင်းများစွာ တိုးတက်လာစေပါသည်။
၇။ မိမိ၏ အလှူဒါနကြောင့် မိမိအား မနာလိုဝန်တိုသည့်ပုဂ္ဂိုလ်များအား စိတ်သဘောထားများ ပြောင်းလဲစေပါသည်။

အထက်ပါ အကျိုးရလဒ်များ အပြင် အခြားသော အကျိုးကျေးဇူးများ လည်းရရှိစေပါသည်။ သံသြဂုတ်စတင်း ဆိုခဲ့သည့် အဆိုတစ်ခုမှာ "သင့်မှာ ပိုလျှံနေသော အရာသည် သင်နှင့်မဆိုင်။ ဆင်းရဲသားများနှင့် ဆိုင်သည်" ဟုဆိုခဲ့ပါသည်။ ထို့အတူ သခင်ခရစ်တော် ကိုယ်တိုင်ပင် "သင်တို့၌ အငယ်ဆုံးသော သူကို ပြုစုခြင်းသည် ငါ့အား ပြုခြင်းပင်ဖြစ်သည်။" ဟု မိန့်တော်မူခဲ့ပါသည်။ ထို့ကြောင့် ကျွန်ုပ်တို့သည် မိမိပတ်ဝန်းကျင်တွင် ရှိနေသူ "အငယ်ဆုံးသောသူများ"အား ကူညီဖေးမပြုစု လှူဒါန်းကြရန် လိုအပ်ပါသည်။ ၎င်းင်းတို့အား လျစ်လျူ မရှုသင့်ကြပေ။ ကျွန်ုပ်တို့သည် ပခုံးနှစ်ဖက်ကြား ခေါင်းပေါက်လာကြသည့် လူပုဂ္ဂိုလ်များ အချင်းချင်း အားနည်းသူကို အားသာသူများသည် မိမိတို့ပိုင်ဆိုင်မှုများထဲမှ ပေးကမ်း လှူဒါန်းရင်း ဖေးမကြရပေမည်။ ထို့ကြောင့် နာဂစ်မုန်တိုင်း ဒုက္ခသည်များအား ကာယ၊ ဉာဏ၊ ဓနအားဖြင့် ကူညီခဲ့ကြသည့် ပုသိမ်သာသနာမှ ကက်သလစ် ရဟန်းရှင်လူများနှင့် မြန်မာနိုင်ငံအနှံ့ရှိ ဆုတောင်းခြင်းဖြင့်လည်းကောင်း၊ စာနာမှု အပြည့်အ၀ဖြင့် စေတနာတရားထက်သန်စွာ လှူဒါန်း ဆက်ကပ်ခဲ့ကြသော ကက်သလစ်ရဟန်း ရှင်လူပုဂ္ဂိုလ်များအား ၀မ်းမြောက်အားရစွာ ဂုဏ်ပြုရင်းဖြင့် စာဖတ်သူအပေါင်း၏ နှလုံးသား၌လည်း သဒ္ဓါတရား ထက်သန်ရက်ရောတတ်သော စိတ်ဓာတ်များ ပို၍ ပွားများနိုင်ကြပါစေ။


ဂျွန်သွီ (မော်လမြိုင်)